कांई केणों राजस्थान रौ
-हनवंत मल लोढ़ा
जयपुर री गुलाबी नगरी है,
चौपड़ बिछियोड़ी सगली है,
सुन्दर ही सुन्दर गगरी है,
औ "गुलाब" हिन्दुस्तान रौ,
कांई केणों राजस्थान रौ?
औ जोधाणो सूरज नगरी है,
उम्मेद भवन सूं किल्ला तक री है,
सुन्दरियां री डगरी है,
घर दुर्गादास मेजर शैतान रौ,
कांई केणों राजस्थान रौ?
मन्डोर सो बाग नहीं जग में,
सरगां सूं सुन्दर रग रग में,
मिठास भरियो है जग जग में,
करे भगवान सो मान मेहमान रौ,
कांई केणों राजस्थान रौ?
"जोधपुरी-कोट" गुण जग जावे
साफो सगलां ने ललचावे,
चुंदड़ी सुन्दरियां मन भावे,
जूती पैरण ने जग आवे,
ओ स्थल स्वाभिमान रौ,
कांई केणों राजस्थान रौ?
झीलां रो शहर उदयपुर है,
ओ सुंदरता सूं सुन्दर है,
ओ बाग बगीचां रौ घर है,
मेवाड़ी पगड़ी धाकड़ है,
पिछोला फतेहसागर है,
ओ मेवाड़ प्रताप महान रौ,
कांई केणों राजस्थान रौ?
है नाथद्वार ने राजसमंद
झीलां रौ राजा जयसमंद
कुम्मलगढ़ ने विजय स्तंभ,
चित्तौड़गढ़ पदमिनी आन रौ,
कांई केणों राजस्थान रौ?
कोटा बूंदी भी निराला है,
चम्बल रा साली साला है,
अजमेरी दरगा वाला है,
बीकानेरी मतवाला है,
अमृत जल जवाई बांध रौ,
कांई केणों राजस्थान रौ?
जैसलमेरी जग ने भावे,
रेतां रा धोरा ना मावे,
दुनियां सारी देखण आवे,
मोरिया मीठा मीठा गावे,
स्थल राजपूती आन रौ
कांई केणों राजस्थान रौ?
आबु पाड़ां रौ राजा है,
राणकपुर मंदिर राजा है,
दिलवाड़ा दिल ने भाजा है,
नक्की रा बाजे बाजा है,
सत् गणों नाकोड़ा भगवान रौ,
कांई केणों राजस्थान रौ?
नर नारी अटा रा प्यारा है,
रणबंका योद्धा खारा है,
बच्चा तो घणा दुलारा है,
ओ गौरव हिन्दुस्तान रौ,
कांई केणों राजस्थान रौ?
एे प्रभु पुर्नजन्म यदि पाऊं
दुनिया में पाछो फिर आऊं,
यादां ने साथ यदि लाऊं,
तो गीत अढा रा ही गाऊं,
कवि बण ने फिर मैं दोहराऊं,
ओ मुल्क मीरां रे भगवान रौ,
कांई केणों राजस्थान रौ?
डायरी और शायरी 
